LPG nga mi-leak niulbo, lima naangol

CEBU, Philippines — Lima ka mga tawo ang naangol atol sa nahitabong sunog sa Sitio Santo Niño, Barangay Poblacion, Sogod kagahapon sa buntag human matud pa gidakop sa kalayo ang nihungaw nga liquefied petroleum gas gikan sa tangke.

Ang mga naangol  human nangapaso mao sila si Prisela Presbitero, 58, Antonio Monterola, 58, Aiza Celebran, 31, Joyce Carzada, 28,  ug usa ka tuig nga batang babaye.

Ang sunog giingon nga gikan sa balay sa managsuon nga Rene Presbitero ug Paz Presbitero.

Ang maong sunog giisa lang hinoon sa 1st alarm ug gibana-bana nga P15 mil ang danyos ug walay gikataho nga nakalas ug duha ka pamilya ang apektado.

Matud pa ni Fire Officer 1 Ericson Usin, usa sa mga nitubag sa maong alarma, nag-init og tubig sa gawas nga bahin sa panimalay ang mga Presbitero, sa dihang nisulod sa panimalay si Rene didto kalit lang gidakop ang leak sa LPG hinungdan sa pag-ulbo.

Sa pakisusi sa kabomberohan, giingong adlaw nga Lunes pa nabantayan nga dunay hungaw ang ilang tangke apan wala lang kini nila panumbalinga, apan kagahapon nahitabo ang disgrasya.

Ang mga nakaangkon ug mga paso  ang dali nga gidala sa tambalanan sa mga sakop sa MDRRMO. /IBM (BANATNEWS)