Mag stay home gihapon bisan Domingo, ang barangay ray padesisyonon
CEBU, Philippines — Gitahas na ni Mayor Edgardo Labella sa Dakbayan sa Sugbo ngadto sa mga opisyal sa Barangay Guadalupe ang pagtimbang-timbang kung ipadayon nila ang paghigpit sa ilang mga residente nga dili makagawas matag adlaw nga Domingo sama sa gipatuman sa dihang ang siyudad gibalik sa enhanced community quarantine ngadto na sa modified enhanced community quarantine gikan Hunyo hangtud sa Hulyo.
Kini human nga ang barangay officials misuwat kaniya nga naghangyong gusto nilang ipadayon ang maong paghigpit bisan sa adlaw nga Domingo tungod sa kabalaka nila nga duna pa gihapoy mga kaso sa COVID-19 diha sa ilang barangay.
Sa dihang gibalik ang Cebu City sa general community quarantine, gilibkas ni Labella pinaagi sa Executive Order No. 86 ang kamandoang suspendido ang tanang quarantine passes matag adlaw nga Domingo.
Kini aron nga mahatagan og kahigayonan ang mga tawo nga makabalik og simba kadtong dunay mga quarantine passes ug basta 10 porsiyento lang sa kapasidad sa mga balay ampuanan ang makasulod.
Matud pa nga nipadala og suwat ang Guadalupe sa mayor nga ipadayon nila ang pagpatuman sa resolusyon sa barangay nga mag stay at home gihapon ang mga tawo bisan adlaw nga Domingo.
Si Labella miingon, naa na sa mga barangay officials ang pagdesisyon niini diha sa ilang dapit. /IBM (BANATNEWS)
- Latest
