Barangay certification aron tugtan ang angkas wa kinahanglana

CEBU, Philippines — Gipahibalo ni  Mayor Junard Ahong Chan ngadto sa mga nanag-iya og motorsiklo sa Dakbayan sa Lapu-Lapu nga wala kinahanglana ang ilang pagbayad  o pagkuha og barangay certifications nga maoy magtugot sa pag-backride sa kapuyo o ilang asawa.

Kini maoy katin-awan sa mayor nunot sa reklamo sa pipila ka molupyo sa barangay Ibo nga gipabayad kini og P130 sa pagkuha og barangay certification aron tugtan na sila nga adunay angkas . Si Mayor Chan sa iyang post sa Facebook miklaro nga way guidelines nga giluwatan alang sa maong katuyuan.

“Atong nahinabi ang DILG mahitungod sa gibuhat sa barangay ug ato na-verify nga walay guidelines nga gipagawas ang lokal o bisan ang national nga kagamhanan nga magpabayad ug bisan unsang amount para itugot ang backriding sa motorcycle. Ang gi-require lang kay mao ang barrier nga kasamtangan pang gitimbang kung angay ba gayud,” suma pa ni Chan.

Base  sa resibo nga gi-post  ni Mayor Chan sa iyang Facebook ang  Barangay Ibo mipabayad ngadto sa mireklamo nga motorcyle owner sa kantidad nga  P100 alang sa certificate ug P30 alang sa documentary stamp. / MEL (BANATNEWS)