Pagpatuman sa work travel pass sa probinsiya giuswag

CEBU, Philippines — Giuswag ngadto sa Agosto 12, 2020 ang pagpatuman sa work travel pass (WTP) pinaagi sa WeTrace application alang sa mga residente sa Probinsiya sa Sugbo nga nagtrabaho sa Siyudad sa Sugbo.

Kini aron sa paghatag og dugang panahon sa mga trabahante sa pagproseso sa ilang application.

Lakip sa advisory sa Probinsiya sa Sugbo pinaagi sa Sugbo News nga ang mga trabahante nga walay smartphones mamahimong mo-coordinate sa ilang local government unit (LGU) aron nga makaproseso sa ilang pag-apply.

Pipila sa mga trabahante nga ni-apply na diha sa WeTrace app ang nireklamo nga wala pa i-confirm ang ilang registration o posibleng wala kini aprobahe.

Si Gobernador Gwendolyn Garcia niluwat kini sa Executive Order No. 20-C alang sa work travel pass mga residente sa Probinsiya sa Sugbo nga ubos na karon sa modified general community quarantine (MGCQ) nga nagtrabaho sa Siyudad sa Sugbo nga karon anaa sa general community quarantine (GCQ).

Ang pagrehistro iagi kini sa WeTrace nga application ug ang magparehistro kinahanglang mopresenta kini og medical certificate, company ID, updated nga certificate of employment ug ID picture.

Sundon lang sa magparehistro ang proseso diha sa app ug kon maaprobahan na kini ang maong trabahante hatagan sa ilang LGU og “point-to-point nga WTP.

Nabutang diha sa WTP ang basic information sa trabahante apil na ang QR code niini ug control number.

Si Garcia nagkanayon nga gituyo ang maong pagrehistro aron mapugngan nga mosaka og balik ang kaso sa COVID-19 sa probinsiya ug ma-monitor ang mga trabahante nga motrabaho sa Siyudad sa Sugbo ug mouli sa ilang panimalay sa probinsiya. /BDB (BANATNEWS)