Munisipyo sa Minglanilla buksan og balik karon

CEBU, Philippines — Ang munisipyo sa Lungsod sa Minglanilla ang buksan na og balik karong adlawa human kini temporaryong gisirado sa nilabayng semana tungod sa gipahigayong disinfection ug decontamination.

Bisan og abli na ang munisipyo apan ang mga kawani sa lungsod dili kini tugotang maka-report sa ilang mga trabaho kong wala sila mopaubos sa mandatory swab test.

Kini base sa giluwatan nga Executive Order No. 29 ni Mayor Elanito “Lani” Peña.

Ubos sa maong EO nga ang tanang mga kawani sa munisipyo regular, casual ug job order kinahanglang mopaubos kini sa swab test una mobalik og report sa ilang trabaho.

Samtang ang mga elected official sa lungsod voluntary lang kong sila buot magpaubos sa swab test gawas kong aduna silay close contact sa nataptan og COVID-19.

“Gidili ang pagpapasulod og balik sa tanang empleyado sa mga opisina sa atong munisipyo hangtud nga naay pagtugot o clearance gikan sa atong municipal health officer”, tipik sa post diha sa facebook page sa lungsod.

Ang mga kawani sa lungsod nga magpositibo sa COVID-19 ang ipaubos sa quarantine.

Nunot niini, bisan og temporaryong gisirado ang munisipyo padayon gihapon ang ilang trabaho ubos sa “work-from-home” scheme.

Kadtong anaa sa frontline services diin ang ilang buhatan nahimutang sa lahi nga building lakip niini ang Health and Safety Personnel (RHU), Emergency Response (DRRMO), Social Welfare Services (DSWD), relief good personnel, in-charge sa locally stranded individuals (tourism office), public market, traffic management personnel ug cleanliness and sanitation ang gipaubos sila sa rotational schedule.

Gawas sa mandatory test sa mga kawani sa lungsod, si Peña niuyon usab sa random testing sa mga kawani sa mga pribadong kompaniya diha sa ilang lugar sa pagbukas og balik sa ilang ekonomiya.

Si Peña maoy usa sa mga mayor nga nisuporta sa Project Balik Buhay ug nipadayag kini nga ang business community kinahanglang mopatuman og istriktong protocols.

Ug kong adunay magpositibo sa COVID-19 nga kawani sa mga establisamento gisugyot sa PBB nga isirado kini sulod sa 24 oras alang decontamination ug contact tracing sama sa gihimo sa munisipyo sa lungsod. The Freeman/BDB