Ekonomiya sa Mandaue nagsugod na og bangon
CEBU, Philippines — Naghinayhinay na sa pagbangon ang ekonomiya sa Dakbayan sa Mandaue gumikan sa pagbalik na sa operasyon sa pipila ka mga establisamento sukad nga gipaubos sa general community quarantine (GCQ) ang estado sa siyudad.
Kini ang gipadayag ni Mayor Jonas Cortes sa gipahigayon nga news briefing sa niaging adlaw uban ni Secretary Martin Andanar, Presidential Communication Operation Office (PCOO) Secretary.
Matud ni Cortes nga wala kaayo makahatag og dakong epekto ang community quarantine sa Dakbayan sa Mandaue tungod kay sa maong mga adlaw nga gipatuman anaa ang kapin sa 50 porsyento nga mga sakop sa Mandaue City Chamber of Commerce Inc. (MCCI) kinsa nagpadayon sa ilang operasyon.
Si Cortes nagkanayon nga ang dakbayan sa kinatibuk-ang dapit dinhi sa Sugbo maoy giila nga industrial hub diin ang kasagaran usab sa mga essential nga establisamento naa nahimutang sa siyudad.
Gibutyag ni Cortes nga sa 457 ka sakop sa MCCI 242 niini mao ang mga essential nga establisemento ug 212 ang temporaryo nga nisirado apan hinayhinay na usab nga nibalik sa ilang operasyon gawas lang sa tulo nga pabilin pa nga sirado.
Nunot niini, gipadayag ni Cortes nga ang tulo ka managsilingang dakbayan nga naglakip sa Dakbayan sa Sugbo nga isip commercial hub ug ang Dakbayan sa Lapu-Lapu isip transportation ang nagtinabangay.
Dugang ni Cortes nga ang ilang panaghiusa alang kini sa Project Balik Buhay (PBB) diin ang tumong niini mao ang paghinayhinay na og bukas sa maong mga dapit alang sa pagpalambo sa ekonomiya. /BDB (BANATNEWS)
- Latest