Brgy kapitan sikop tungod sa mahjong

CEBU, Philippines — Gidakop sa kapolisan sa Lungsod sa Argao ang kapitan sa Barangay Langtad gumikan sa pagduwa og mahjong.

Ang gidakop mao si Kapitan Joel Saragena, 51, ug mga kaduwa niini nga sila si Cipriano Remoroza Lanutan, 69; James Carlo Zamora de Los Reyes, 34, ug Richardson Panebio Sarsaba, 32-anyos.

Matud ni Argao Police Station chief, Police Captain Elstone Dabon, nga nakadawat sila og reklamo nga adunay sugalan sa barangay nga giingong gidumala ni Lanutan.

Sa pagsusi sa kapolisan maoy naabtan sila si Saragena ug mga kauban niini nga nagsugal ug wala na nakaipsot.

Gipasabot ni Dabon nga gidili pa karon ang tanang matang sa sugal samtang ubos sa modified general community quarantine ang Probinsiya sa Sugbo tungod sa coronavirus disease. /GMR (BANATNEWS)