Cebu City di na ‘epicenter’ sa COVID-19 sa nasud

CEBU, Philippines — Dili na matawag ang Dakbayan sa Sugbo nga “epicenter” sa coronavirus disease sa nasud.

Kini sumala pa ni Environment Secretary Roy Cimatu, ang overseer sa Inter-Agency Task Force Cebu, tungod sa pag-ubos sa mga bag-ong kaso ug sa natala nga nakalas sulod sa pipila ka adlaw sa pagpatuman sa general community quarantine. Matud ni Cimatu nga nagpakita kini nga ang siyudad padulong na sa recovery.

Dihang gibalik ang Dakbayan sa Sugbo ubos sa enhanced community quarantine, ang National Capital Region gipaubos sa GCQ apan dihang ang dakbayan mao na sab ang gipaubos sa GCQ, ang kaulohan na sab ang gibalik sa modified ECQ.

Giawhag ni Cimatu ang mga Sugbuanon nga dili mokompiyansa ug magpabilin lang gihapon nga magpuyo sa balay ug dili mogawas sa kung walay mga importante nga lakaw o buhaton sa gawas aron dili mabalik sa MECQ o kaha sa ECQ kung modagnan na sab ang kaso sa COVID-19. /GMR (FREEMAN)