Mga nakalapas sa health protocol sa Mandaue gipalimpyo sa ilang detention cell

CEBU, Philippines — Gidala sa Department of  General  Services (DGS) facility nga nahimutang sa Barangay Labogon sa Dakbayan sa Mandaue ang mga nasikop nga nakalapas sa health protocol nga gipatuman sa gobyerno paglikay sa pagkatap sa COVID-19.

Ang mga nadakpan gipatabang og limpyo sa building aron mamahimo kining hamugaway og magamit ang tanang lawak niini isip detention cell sa mga malapason sa health protocol.

Ang DGS facility nga gipanag-iya sa kagamhanan  sa Dakbayan  sa Mandaue maoy gihimo nga detention  cell alang niadtong mga gahi og ulo nga padayon  nga dili motuman sa lagda sa kwarantina.

Si Mandaue City  Mayor  Jonas Cortes mihingusog sa pagpatuman  sa mga health protocol sa tinguha nga kapugngan ang pagkuyanap  sa coronavirus  disease 2019, kini gumikan usab sa kabalaka nga posibleng mausab ang estado niini sa gipatuman nga community quarantine.

Subay niini gihugtan usab ang pagpatuman sa ordinansa nga nagtakda og multa nga 1,000 ngadto sa P5,000 mil pesos sa mga madakpan nga makahimo og kalapasan apil na ang pagpasaka og kaso ngadto sa korte.

Sa nasayran ang Dakbayan sa Sugbo, Mandaue  Lapu-Lapu, ug Talisay, ingon man ang lunsod sa Consolacion ug Minglanilla ang managsama nga  ubos na sa  general community quarantine (GCQ) ang estado.  /MEL (BANATNEWS)