Mga kawani sa Minglanilla ipaubos sa swab test

CEBU, Philippines — Gihimo nga mandatory sa Lungsod sa Minglanilla ang pagpaubos sa swab test sa mga empleyado sa munisipyo nga magpakita og sintomas sa COVID-19.

Si Mayor Elanito Peña nagkanayon nga adunay usbon sa una niyang giluwat nga Executive Order No. 29 nga naghimong mandatory ang pag-swab test sa tanang empleyado sa munisipyo.

Ang mga magpositibo sa swab test ipaubos kini sa kwarantina ug dili makabalik sa trabaho kong wala kini clearance gikan sa municipal health officer sa lungsod.

Gibutyag ni Peña nga mo-issue ang lungsod og passes alang sa mga residente sa Minglanilla nga nagtrabaho ngadto sa Dakbayan sa Sugbo kini human nga napaubos na ang siyudad sa general community quarantine (GCQ).

Matud ni Peña nga kinahanglang morehistro sa “WeTrace.ph” nga app ang trabahante aron ma-monitor ug masiguro kini nga kutob lang sa ilang trabahoan sa Siyudad sa Sugbo ug sa ilang balay diha sa Minglanilla ang lihok niini.

Sa laing bahin, temporaryong siradoan sugod karong adlawa hangtud sa Agosto 7, 2020 ang munisipyo sa lungsod alang sa ipahigayong disinfection.

Sa maong mga adlaw “work from home” lang una ang mga empleyado gawas sa mga frontline service personnel nga kinahanglang mo-report sa trabaho.

Dugang ni Peña nga gidili usab ang pagsulod sa tanang empleyado sa ilang mga opisina sa munisipyo kong walay pagtugot o clearance gikan sa municipal health officer. Rowena D. Capistrano/BDB (BANATNEWS)