Siquijor di na COVID-free, nasudlan og 2 ka kaso
CEBU, Philippines — Dili na COVID-free ang Lalawigan sa Siquijor human duha ka kaso sa coronavirus disease 2019 ang natala sa maong lalawigan.
Si Gob. Zaldy Villa nagkanayon nga ang duha ka bag-ong kaso sa COVID-19 taga Lungsod sa Lazi ug Larena.
“Bisan pa tuod sa atong pagpaningkamot sa hugot nga pagpatuman sa health protocols, ang isa taga Lungsod sa Lazi ug ang isa taga Lungsod sa Larena nga gikan sa Manila. Atong klaruhon nga wala ta’y local transmission diri sa Probinsiya,” matud ni Villa.
Matud ni Villa nga padayon nga gipatuman sa mga medical frontliners sa probinsiya ang paagi aron maulian ug dili mokatap ang virus sa Siquijor.
“Among hangyoon ang tanan nga atong i-ampo ang kaluwasan sa atong tanang frontliners sa atong mga kaubang Siquijodnon,” matud ni Villa.
Si Villa niawhag sa taga Siquijor nga magpabilin nga kalmado sanglit padayong naglihok ang probinsiya aron dili managhan ang kaso sa COVID-19 sa probinsiya.
Ubos sa pito ka buwan, ang Lalawigan sa Siquijor maoy nagpabilin unta nga COVID-free nga probinsiya sa tibuok Central Visayas. /GMR (BANATNEWS)
- Latest
