Flower arranger, ex-seaman namaligya og shabu sikop

CEBU, Philippines — Sikop sa buy-bust operation ang usa ka flower arranger kinsa ni-sideline og pagpamaligya og shabu ala 1:50 pasado kagahapon sa hapon sa Sitio Freedom Park, Barangay Ermita, Siyudad sa Sugbo.

Ang operasyon gipahigayon sa Drug Enforcement Unit sa Carbon Police Station pinangulohan ni Police Captain Alvin Llamedo nga niresulta sa pagkasikop ni Saturnino Lariosa Escultor, 44, minyo ug nagpuyo sa maong dapit.

Nakuha gikan kang Escultor ang gibanabana nga kapin sa singko gramos sa gidudahang shabu nga mobalor P34,000.

Matud ni Escultor nga bag-ohay lang siya namaligya og shabu tungod sa kaminus sa mamalitay og buwak.

Ang dinakpan gibalhug sa selda sa Carbon Police Station.

Samtang kanhi seaman sikop sab sa buy-bust operation sa Provincial Intelligence Branch pinangulohan ni Police Lieutenant Colonel Randy Korret alas 6:30 niadtong Biyernes sa gabii sa Sitio Kalubihan, Barangay Talamban, Dakbayan sa Sugbo.

Ang dinakpan mao si Henry Abatayo Lao, 47, minyo nga nagpuyo sa Sitio Dawis, Barangay San Roque, Siyudad sa Talisay.

Atol sa operasyon nakuha kang Lao ang gibanabana 30-gramos sa gidudahang shabu nga mobalor og P204,000 ug lakip sa gisakmit ang sakyanan nga maoy iyang gigamit sa ilegal nga kalihukan. /GMR (BANATNEWS)