SLIs di pa gihapon makabiyahe

CEBU, Philippines — Nadismaya ang pipila nga locally stranded individual sa Dakbayan sa Sugbo tungod sa makalibog nga mga tamdanang gipasunod kanila aron unta makauli na sila sa ilang mga probinsya paggawas sa Sugbo.

Si Ana (dili niya tinuod nga pangalan) nga taga Naval, Biliran nga kasamtangan nga nag puyo sa Barangay Lahug mipaabot sa iyang reklamo sa Banat News.

Matud pa ni Ana nga niadtong Martes nagsugod na usab sila og proseso sa mga dokumento nga gikinahanglan aron unta nga makauli na sa Biliran kun tugotan na sa Department of Interior and Local Government (DILG) nga sila makabiyahe.

Usa sa kinahanglan nilang lukaton mao ang medical certificate sa Cebu City Health Department apan pagabot nila didto gisultian sila nga hatagan lang sila niini kun aduna na silay ticket sa barko o flight ticket nga mapakita. Tungod niini, nagdali-dali sila og lukat og tickets bisan pa man nga nagdaginot og kwarta basta makauli lang sa ilang probinsya. Tuod man, si Ana nakalukat og plane ticket nga P5 mil ug kagahapong adlawa unta ang flight. Tungod kay nakakuha na sila og plane ticket niadto sab sila sa kapolisan aron sa pagkuha sa Travel Authority apan didto gibalibaran sila tungod wala pay abiso gikan sa DILG ug IATF nga makalarga na sila pagawas sa dakbayan.

Travel Authority

Base sa gipagawas nga IATF guidelines dili pa makabiyahi ang mga SLIs kun gikan sila sa lugar nga ubos sa Enhanced Community Quarantine (ECQ) ngadto sa lugar ubos sa General Community Quarantine (GCQ) o ubos pa.

Si Konsehal Joel Garganera kinsa bag-ohay lang gitudlong Deputy Chief Implementer of Inter-Agency Task Force(IATF) Emergency Operations Center(EOC)-Cebu City nga gisuspenso una ang processing sa travel authority sa mga LSIs tungod sa ECQ.

Apan matud niya pwede nang sugdan ang pagproseso sa ubang mga dokumento o rekisitos apan dili una ang travel authority nga diin ang Philippine National Police lang ang mohimo.

Libreng ticket

Si Garganera miasoy nga ang siyudad nitabang karon sa mga in-bound passengers o kadtong mga pasaherong taga Cebu City apan na-stranded sa ubang lugar sa Pilipinas.

“Ato ng na-meet together with City Administrator ang tanan nga mga shipping lines ug ang atong instructions ug atong na-agreed nga og makapakita sila ticketing office og travel authority kanang COVID Shield sa PNP, automatic tagaan dayon sila og libreng ticket way pangutana,” matud ni Garganera.

Gawas sa libreng ticket, katunga sa mga shipping lines ang nisugot nga mohatag og tag P1,000 kada pasahero aron duna silay panggastos.

Matud ni Garganera aduna karoy pending nga 16 mil ka aplikante pagkuha og travel authority nga giduso diha sa Mayor Office gikan sa Cebu City Police Office apan di pa kini nila maaprubahan tungod kay ECQ pa ang siyudad. Hinuon libre gihapon ilang ticket sa barko kun makapakita na sila og travel authority. Samtang mahimo silang moduol sa DSWS ug DSWD pagpangayo og hinabang basta makakompleto sila sa mga rekisitos nga gipangayo. Decemay P. Padilla/IBM (BANATNEWS)