Usa angol, 11 nadakpan sa drug bust

CEBU, Philippines — Usa ang naangol samtang laing 11 ka mga tawo ang nangadakpan sa managlahing anti-drug operations nga gihimo sa kapolisan ug mga sakop sa Philippine Drug Enforcement Agency.

Sa Talisay City, nasamdan ang repair technician  nga si Jonathan Solana Sigue, 41, human napusilan sa operatiba sa Talisay City Police Station tungod kay giingong misuway kini sa pagsukol sa mga polis nga misikop kaniya.

Si Police Major Gerard Ace Pelare, pangu sa Talisay City Police Station nagkanayon nga usa ka High Value Individual (HVI) si Sigue.

Giingong mibunot sa iyang armas ang suspek pagkabantay nga polis ang iyang kasabot, tungod niini giunhan kini pagpusil diha sa iyang tuong paa.

Nakuhaan gikan ni Sigue ang 12 ka gagmay ug duha ka medium nga paketeng gidudahang shabu, usa ka .38 nga revolver nga adunay tulo ka bala.

Ang shabu nga nakuha sa suspek nitimbang og 10.55 gramos nga adunay gibana-banang P71,740. Ang suspek gidala sa tambalanan.

Samtang sa Cebu City, nadakpan diha sa Duljo- Fatima kagahapon sa udto sa mga sakop sa Philippine Drug Enforcement Agency-7 pinangulohan ni IA I Jonar Cuayzon uban sa mga sakop sa Regional Intelligence Division sa PRO-7 si Cristian Recafort, alyas Elijah, 26.

Nasikop si Recafort diha sa dalan C. Padilla human giingon nibaligya og shabu sa mga operatiba.Nakuha gikan kaniya ang 50 gramos nga gidudahang shabu nga nagkantidad og P340 mil ug buy-bust money.

Sa operasyon sa kapolisan sa Dakbayan sa Lapu-Lapu napulo ka gidudahang mga drug pushers lakip sa duha ka babaye ang nangadakpan sa grupo ni Police Captain  Airbert  Jay Samson , hepe  sa Presinto 5. Rowena Capistrano, Romeo T. Limpangog/IBM (BANATNEWS)