Sementeryo dili na madayon og tukod diha sa Guba

CEBU, Philippines — Ang pagpatukod og sementeryo sa kagamhanan sa Dakbayan sa Sugbo diha sa Sitio Katives, Barangay Guba ang dili na mahinayon.

Sayo pa, gipahunong sa Department of Environment and Natural Resources (DENR)-7 ang kaugmaran diha sa maong lugar tungod kay walay permit ang siyudad ilabi na sa pagputol sa kapin 300 ka punoan sa Mahogany.

Nunot niini, si Mayor Edgardo Labella nagkanayon nga ang pagtukod og sementeryo ibalhin na diha sa Sitio Patayng Yuta ug Sitio Basakan, Barangay Sapangdaku.Giingong walay public transport padulong sa maong lugar apan patag ug konkreto ang dalan sa dapit.

Kagahapon sa buntag gi-certify kini ni Labella nga urgent tungod kay sa dili pa makatukod og sementeryo ang konseho kinahanglang mopalabang kini og ordinansa nga aprobahan usab sa mayor.

Ang siyudad buot kining makatukod og bag-ong sementeryo tungod kay puno na ang mga sementeryo sa siyudad.

Gibutyag ni Labella nga ang luna diha sa Barangay Sapandaku aduna kini gilapdon nga  duha ka hektariya diin mamahimo kining palapdan kong kinahanglanon. Rowena D. Capistrano/BDB (BANATNEWS)