Labella: Gibuhat sa Cebu City ang tanan batok COVID-19
CEBU, Philippines — Si Cebu City Mayor Edgardo Labella naglaum nga paubsan gikan sa enhanced community quarantine ngadto sa general community quarantine sugod karong adlawa ang siyudad.
Sumala pa sa mayor, sa iyang tan-aw gibuhat na sa siyudad ang tanan pagtagad sa pandemiya.
"After all if you look at the statistics, Cebu City has the highest number of recovery. If you base on the recovery rate, we have the highest number. That is something that should be seriously considered," dugang pa ni Labella.
Sumala pa sa mayor maong misaka gyud ang mga kaso sa siyudad tungod kini sa massive testing nga gihimo sa siyudad apan alang kaniya importante sab nga tan-awon ang recovery rate.
"If we have not done enough, we would not have that high rate of recovery," dugang pagpasabot sa mayor.
Base sa DOH-7 Official Facebook Page, sa Hulyo 13, 2020 miabot na og 7,520 ang kaso sa Cebu City, diin 3,338 ang active cases ug 3,818 ang recoveries samtang 364 na ang nakalas.
Karong adlwa, Hulyo 15 mahibaw-an kun may kausaban ang estado sa siyudad.
Apan bisan unsa pay desisyon sa IATF sa siyudad, si Labella padayong nanawagan sa katawhan nga mosunod gyud sa mga health protocols isip ilang tampo sa paningkamot sa siyudad pagpakunhod sa mga kaso sa COVID-19 dinhi sa siyudad.
Sa pikas bahin, gipahibalo ni Police Regional Office 7 director Police Brigadier General Albert Ferro nga magpabiling istrikto ang pagpatuman sa community quarantines kay kinahanglang hinayhinay ang pagpaluag niini.
Hinuon nabantayan karon nga aduna nay kalamboan ilabi na nga ubos nalang ang mga nataptan sa maong sakit itandi sa nanglabay nga mga semana. Sheriza Mae Uy/IBM (BANATNEWS)
- Latest
