Mga dump truck giapod-apod sa mga barangay sa Mandaue

CEBU, Philippines — Nangabot na ang mga dump truck nga gipalit sa kagamhanan sa Dakbayan sa Mandaue aron ipanghatag ngadto sa kabarangayan.

Nahibaw-an pinaagi sa post sa facebook sa Mandaue City Public Information Office nga gisugdan na sa pag apod apod ngadto sa mga barangay ang maong mga dump truck nga mokantidad og 27 milyones pesos.

Nasayran nga ang unang hugna sa delivery miabot na niadtong miaging Myerkules Hulyo 8,  2020.

Si Mayor Jonas Cortes uban  ni Konsehal  Carmelino del Mar Jr ang  mitugyan og siyam ka mga multi-purpose dump truck ngadto  sa mga barangay kapitan  sa Alang-Alang,  Bakilid, Cambaro, Casili, Casuntingan, Centro, Labogon, Looc ug niadtong Biyernes  Hulyo 10, 2020  sa Barangay  Tipolo.

Gihimo ang pagtugyan  sa maong mga  dump truck  sa Mandaue City Cultural and Sports Complex sa Barangay Centro  sa maong dakbayan.

Si  Mayor Cortes sa iyang pagpasabot miingon nga gikinahanglan gayod  kaayo sa kabarangayan ang maong matang sa sakyanan tungod kay nangaguba na ang mga karaan nilang dumptruck.

Ang maong mga sakyanan gikinahanglan kayo sa kabarangayan ilabi na sa pagtubag sa mga emerhensya panahon sa bagyo ug ubang kalamidad sama sa linog, pagbaha ug uban pa. /MEL (BANATNEWS)