Tanod, konsehal gidudahang namatay sa COVID-19

CEBU, Philippines — Usa ka konsehal ug barangay tanod sa Dakbayan sa Talisay ang nangamatay niadtong Biyernes.

Una niini, si Ernesto Royo Jr., 50, taga Barangay Poblacion, gitabang dihang naglisud og ginhawa ug wala magdugay nakabsan gyud sa iyang kinabuhi sa Talisay District Hospital.

Matud ni Kapitan Edward Alesna sa Poblacion nga sakop sa Barangay Health Emergency Response Team (BHERT) si Royo ingon man tanod sab kini ug lakip sa mag-monitor sa mga tawo nga gi-quarantine.

Apan upat ka adlaw na kining nagreklamo sa iyang kalibanga.

Nagkanayon si Alesna nga gipaubos si Royo sa rapid test dihang nagmulo kini sa iyang unang gipamati apan nigawas nga negatibo.

Dihang namatay na, gipaubos kini sa swab test apan sa pagsuwat niining balita wala pa ang resulta.

Gumikan sa hitabo, lockdown lang una ang Barangay Poblacion samtang 20 ka tanod, 20 ka barangay health workers ug unom ka staff ang gipang-quarantine.

Sa laing bahin, usa sab ka konsehal sa Barangay Dumlog ang namatay niadtong Biyernes.

Si Kapitan Nelson Abellana niila sa namatay nga si Konsehal Hob Dela Cuesta, 70-anyos.

Matud ni Abellana nga usa na ka buwan nga wala katambong sa barangay si Dela Cuesta gumikan sa sakit nga pneumonia.

Apan nisamot ang kahimtang ni Dela Cuesta hinungdan nga gidala kini Talisay District Hospital.

Nagkanayon si Abellana nga nakadawat siya og taho nga COVID-19 ang gikamatyan ni Dela Cuesta apan paaboton nila ang resulta sa swab test.

Adunay duha ka person under investigation ug usa ka positibo nga kawani sa Barangay Dumlog sa pagkakaron.

Frontliner na-COVID

Samtang ang 32-anyos nga medical frontliner sa Purok Manga 2, Barangay Poblacion, Lungsod sa Liloan maoy nalakip sa pasyente sa COVID-19.

Sa post sa social media sa kagamhanan sa maong lungsod maoy nasayran nga nurse nga lalaki ang maong medical fontliner nga nadestino sa Renal Department sa Vicente Sotto Memorial Medical Center.

Samtang ang 55-anyos nga lalaki nga molupyo sa Barangay San Roque sa maong lungsod maoy labing ulahi nga nakalas sa pagtakboy sa COVID-19 sa maong lungsod.

Gihimo na sa Municipal Health Office ang contact tracing alang ngadto sa mga mga sakop sa pamilya nga nakapaduol ug ingon man ang mga kauban sa trabaho sa maong namatay nga pasyente.

Dul-an na sa 12,000 ang total confirmed cases sa COVID-19 sa tibuok Central Visayas human nga 306 ka bag-on kaso ang natala niadtong Hulyo 11, 2020.

Sumala sa Department of Health 7 nga niabot na sa 11,879 ang kinatibuk-ang kaso sa COVID-19 sa Rehiyon 7 diin 6,392 ang active cases; 4,951 ang nakarekober na ug 536 ang namatay.

Ang Dakbayan sa Sugbo adunay 3,264 ka active cases base sa Hulyo 11 nga datus sa DOH-7; 801 ang active cases usab ang Mandaue City, 854 ang Lapu-Lapu City, 1,420 sa Cebu Province, 38 sa Negros Oriental ug 15 sa Bohol. Romeo T. Limpangog, Le Phyllis F. Antojado/GMR (BANATNEWS)