Hapon nga boksidor nakigsinukmagay sa coronavirus
CEBU, Philippines — Ang babayeng boksidor sa Japan nga si Arisa Tsubata, kinsa nagdamgo makaduwa sa Olympics, naanad nang mokaon og kumo ibabaw sa ring. Apan sa iyang trabaho isip nurse iyang nahimamat ang labing bagsik niyang kontra, ang coronavirus.
Mao kini ang hinungdan ngaong gibahin sa 27-anyos nga si Tsubata ang iyang oras sa brutal niyang training sul-ot ang boxing gloves ug sa irregular niyang oras sul-ot ang surgical gloves sa gitrabahoan niyang hospital duol sa Tokyo.
Giatiman ni Tsubata ang mga pasyente nga dunay canser, apan matud pa niya nga sa kanunay hulga ang virus nga dili makita ug wa'y gipili nga biktimahon. Sama sa ubang mga atleta, ang pandemiya nakaguba sa preparasyon ni Tsubata mao nang gibati siya og tumang kalipay nga nauswag ang Tokyo Olympics sunod tuig.
Si Tsubata nagboksing duha ka tuig pa lamang ang milabay, apan inubanan sa kagugi ug determinasyon, nahimo dayon siyang national champion sa Japan.
Sunod niyang gitiradahan mao ang pagdala sa bandila sa Japan sa prestihiyosong Olympics nga mahitabo kausa lamang sud sa upat ka tuig, apan karon nahimong lima tungod sa pandemiya.
- Latest