Nakalapas sa protocols sa Lapu-Lapu ipa-report sa social media

CEBU, Philippines — Gitinguha sa kagamhanan sa Dakbayan sa Lapu-Lapu nga kapugngan ang pagsaka  sa gidaghanon sa nataptan sa covid-19 hinungdan nga nalakip na karon sa ipatuman nga paagi mao ang paggamit  sa social media alang sa pagtaho sa mga malapason nga molupyo.

Si  Mayor Junard Ahong Chan nagkanayon nga bisan kinsa nga makaakto og tawo nga anaa sa gawas nga wala magsul-ob og face mask  iyang awhagon sa pagtaho pinaagi sa  facebook diin kompletohon lang ang detalye sa ilang taho diin lakip niini ang oras, adlaw ug dapit diin nahitabo. Matud ni Chan nga mahimo usab nga kuhaan og hulagway ug i-post diha sa facebook ug kompletohon gihapon ang  pagbutang sa adlaw, oras, petsa ug dapit diin nahitabo.

Ang siyudad adunay gitahasan nga grupo nga mohimo og validation sa maong taho nga ilang madawat  sa pagsiguro nga dili kini mahimong kaabusohan  sa pipila ka mga mapahimuslanon.

Nasayran nga higpit ang pagpatuman  sa Dakbayan  sa Lapu-Lapu  sa ordinansa nga nagpahamtang og silot sa mga tawo nga wala motuman sa health protocols sama sa pagsul-ob og face mask ug social distancing paglikay  sa covid-19.

Subay sa maong ordinansa nga gipatuman, sa unang kalapasan ang nakalapas pahimangnoan una kini, sa ikaduhang kalapasan pabayaron og P1,000 nga multa ug sa ikatulong kalapasan pabayaron og P3,000 nga multa o pagkabilanggo sulod sa 30 ka adlaw. /BDB (BANATNEWS)