BFP-7 nagtinguha og kaugalingon nga isolation center

CEBU, Philippines — Tinguha karon sa Bureau of Fire Protection BFP-7 nga makabaton ug isolation center alang sa mga sakop sa kabomberohan nga magpositibo sa covid-19.

Kini ang gitug-an ni Fire Chief Inspector Noel Nelson Ababon, ang pangulo sa Regional Operations Division ug kasamtangan nga tigpamaba sa Covid-19 sa BFP-7.

Matud pa ni Ababon, nangita pa sila karon ug warehouse aron mahimo nilang isolation facility.

Gikinahanglan pa usab nila nga  iduso ngadto sa ilang ulohan nga buhatan ang mao nilang plano tungod kay nagkinahanglan man usab kini ug pundo.

Gitug-an ni Ababon  nga ang mga sakop sa BFP-7 nga naka-isolate naa usa kini kasamtangang gipahiluna sa San Nicolas fire substation, samtang ang uban anaa sa mga local government unit kung diin nahimutang ang fire stations.

Nasayran nga kasagaran sa mga nagpositibo sa BFP-7 kadtong nagdumala sa Quarantine Control Points, ug kadtong mopahigayon sa disinfection.

Malaumon si Ababon nga makabaton sila ug kaugalingon nga isolation facility alang  sa mga sakop sa BFP. /MEL (BANATNEWS)