Duha ka isolation center tukoron sa Dakbayan sa Mandaue

CEBU, Philippines — Gitinguha  sa  kagamhanan  sa Dakbayan  sa  Mandaue ang pagtukod og duha ka mga isolation center nga maoy butangan sa mga pasyente nga dunay coronavirus disease COVID-19.

Kini naglakip sa Norkis Park nga nahimutang sa Barangay Looc ug Cebu North Bus Terminal nga nahimutang  sa Barangay  Subangdaku. Nasayran ang Department of Education (DepEd) mipahibawo nga kutob na lang sa Hulyo 30, ning tuiga ang paggamit  sa mga publikong tunghaan  isip isolation center  sa mga nagpositibo sa covid-19.

Naglakip sa labing  dako nga  isolation center sa  kagamhanan sa maong dakbayan mao ang  Mandaue City Central School nga nahimutang sa Barangay Centro nga masudlan og kapin sa  1,700 ka  mga pasyente.

Ang pangulo  sa  DepEd   sa Dakbayan  sa Mandaue nga si Dr. Nimfa Bongo sa iyang resolusyon nga gipadangat ngadto  sa  Regional Inter-Agency Task Force on Emerging Infectious Diseases nagpadayag nga ang  katapusan nga paggamit  sa mga publikong tulunghaan isip mga  isolation centers  hangtod na lamang sa Miyerkules Hulyo 15, 2020.

Subay niini si Mayor Jonas Cortes mihangyo sa kadagkoan  sa DepEd sa paglugway hangtod sa Hulyo 30, 2020 tungod kay nangita pa ang syudad  og kabalhinan  nga mahimo nga bag-ong quarantine facilities.

Ang negosyante nga si Norberto Quisumbing Jr.  nga maoy tag-iya sa Norkis Park misanong usab sa hangyo ni  Mayor  Cortes nga  tukoran ug isolation center ang maong propedad. /MEL (BANATNEWS)