Hepe gikatahapang namatay sa COVID-19
CEBU, Philippines — Gipaubos sa lockdown sa Police Regional Office (PRO)-7 ang police station sa lungsod sa Carmen, Probinsiya sa Bohol kagahapon.
Kini human nga namatay ang hepe niini niadtong Sabado ug gidudahan nga nataptan og covid-19.
Matud sa direktor sa PRO-7 Police Brigadier General Albert Ferro nga dali nga gipaubos sa swab testing ang kapin 20 ka personnel sa Carmen Municipal Police Station.
Niadtong Sabado dali nga gidala sa tambalanan ang hepe tungod ky naglisod kini og ginhawa apan pila ka oras ang nilabay nakabsan kini sa kinabuhi.
Giingong sa wala pa mamatay ang maong polis nakuhaan kini og swab sample tungod kay nireklamo kini nga naghuot ang iyang dughan ug naglisod sa pagginhawa.
Lakip sa gi-isolate ang pamilya sa maong polis ug gikatakdang ipaubos usab sa swab testing.
Matud usab ni Ferro nga kong ugaling mogawas ang resulta nga nagpositibo ang hepe sa covid-19 mao kini ang ikalima nga sakop sa PRO-7 nga namatay gumikan sa maong virus.
Sa laing bahin, nigradwar na usab sa isolation and 18 ka recoveries nga polis sa ika- upat nga batch sa recoveries sa Central Visayas.
Nikabat na ngadto sa 78 ka recoveries, 264 confirmed positive cases ug upat ang namatay nga polis tungod sa covid-19.
Gawas sa 18 nga nakagradwar na gikan sa recovery center laing kapin sa 20 ka polis nga gikan sa isolation center ang ibalhin sa recovery center alang sa pito ka adlaw nga recovery period.
Ang maong mga polis nagnegatibo na kini sa swab testing. /BDB (BANATNEWS)
- Latest