27 ka tawo nakalapas sa protocols sikop sa Talisay
CEBU, Philippines — Ang mga nakalapas sa safety protocols sa Dakbayan sa Talisay gipasakay kini sa sakyanan sa military ug gipangtanggong diha sa basketball gym sa Barangay Tapul kagahapon sa buntag.
Ang grupo sa mga sundalo, kapolisan ug Bureau of Jail Management and Penology (BJMP) nilibot diha sa Barangay Bulacao, Tabunok, Lagtang, Lawaan 1, Lawaan 2 ug Linao aron pagpatuman sa guidelines labot sa pakigbatok sa covid-19.
Nagpahigayon usab sila og rekorida aron malikayan ang virus.
Ang ilang gibuhat ubos kini sa hangyo ni Mayor Gerald Anthony “Samsam” Gullas Jr. aron usab menos ang tawo nga manggawas.
Niabot ngadto sa 27 ka mga indibidwal ang nakalapas sa safety protocols diin gipangkarga sila sa sakyanan sa military ug gidala ngadto sa Barangay Tapul.
Ang maong paglibot sa mga otoridad giingong ipahigayon kini sa matag adlaw aron ang mga residente dili kini manggawas kong walay mga importanteng katuyoan. /BDB (BANATNEWS)
- Latest