HOJ sa Naga sirado, CH sa Lapu-Lapu walay transaksiyon kagahapon
CEBU, Philippines — Ang hall of justice building sa Dakbayan sa Naga temporary kining sirado sulod sa 14 ka adlaw sugod kagahapon.
Kini human nga usa ka staff sa Regional Trial Court (RTC) Branch 76 ang naghilanat ug nagpositibo kini sa covid-19.
Nakig-alayon na usab ang RTC Branch 76 sa mayor sa Dakbayan Naga alang sa pag-disinfectant sa opisina ug tibuok HOJ building aron mapugngan ang pagkatap sa covid-19 sa lugar.
Atol sa temporaryong pagsirado sa HOJ sa Naga, ang RTC Branch 76 ug Municipal Trial Court in the Cities (MTCC) ang gipahimangnonan nga sundon ang guidelines sa Supreme Court alang sa online filing sa mga reklamo, information, pagpiyansa, work from home arrangements court personnel ug videoconference hearings kon applicable kini aron masiguro nga dili mahunong ang operasyo sa korte.
Sa laing bahin, walay mga transaksiyon kagahapon diha sa Lapu-lapu City Hall tungod kay gipang-disinfect ang tanang buhatan niini.
Ang mga kawani sa city hall ang nipahigayon sa pag-disinfect sa tagsa-tagsa nila ka buhatan.
Sa facebook page ni Mayor Junard “ahong” Chan gipahibalo niini nga wala sila manawat og mga transaksiyon tungod kay nagpahigayon sila og disinfection aron masiguro nga luwas ang tanan nga mosulod diha sa city hall.
Matud ni Chan nga karong adlawa mobalik na sa normal ang operasyon sa city hall.
Ang pag-disinfect sa lugar gihimo human upat ka opisyal sa siyudad ang nataptan sa covid-19 lakip niini si Chan. Rowena D. Capistrano/BDB (BANATNEWS)
- Latest
