14 ka proyekto sa daanbantayan way liquidation suma pa sa COA

CEBU, Philippines — Katorse (14) ka mga proyekto ug programa sa lungsod sa Daan Bantayan ubos sa Trust Fund niini ang wala pa napatuman o napatuman na apan wala pay liquidation nga na-report sa tuig 2019.

Sa Executive Summary sa Commission on Audit (COA), gisaysay nga moabot sa P29.9 milyones ang kantidad sa maong mga proyekto gikan sa national government agencies ang wala napatuman o walay liquidation.

“thus, resulting in the overstatement of liability accounts, non-recognition of expenses incurred as well exposing the funds to possible misuse or loss” pagbasa sa summary finding sa Commission on Audit (COA).

Tungod niini, girekomendar sa COA ngadto sa lokal nga kagamhanan sa lungsod sa Daan Bantayan nga ipatuman dayon ang maong mga proyekto  nga gipondohan sa nasudnong kagamhanan, ug uban pang ahensya sa gobyerno aron nga walay kalangay sa benepisyo nga makuha gikan sa maong mga programa.

Apan kun ugaling dili mapatuman ang maong mga proyekto gisugyot sa COA nga i-uli ang pundo niini ngadto sa ahensya nga gikuhaan sa pundo o source agencies.

Ang COA nagkanayon nga kinahanglan ang Municipal Accountant mohimo og liquidation sa tukmang panahon ug ang wala magasto nga pondo mabalik sa tinubdan nga ahensya inig kumpleto sa gipatuman nga proyekto o programa didto sa lungsod. /MEL (BANATNEWS)