Pagsaka sa bayad sa mga doktor gisaway
CEBU, Philippines — Gisaway sa kanhi presidente ug general manager sa Government Service Insurance System, Atty. Winston Garcia, ang lakang sa Philippine College of Physician sa pagpasaka sa bayad sa mga doktor.
Matud ni Garcia kinsa mao karon ang chairman sa Cebu CFI Cooperative, usa sa labing dakung kooperatiba sa nasud, nga sakit alang sa mga kabus ang lakang sa PCP atol niining krisis sa coronavirus.
Matud ni Garcia nga minilyon ka Pilipino ang wala nay trabaho samtang liboan sa mga patigayon ang nanirado tungod ra sab sa mando sa mga tinugyanan sa panambal nga magpuyo sa balay aron malikayan ang pagkuyanap sa sakit.
Apan sumala pa ni Garcia nga ang medical community mao ra sab ang nakabenepisyo sa panahon.
“How often it has been said that a crisis brings out the best in some and the worse in others,” matud ni Garcia.
Sumala pa ni Garcia nga ang lakang sa kadagkuan sa PCP nagpakita lang sa tinud-anay nga bulok ug mga tinagoan.
Ang pamahayag ni Garcia nakainsulto sa pipila ka doktor ug gikwestyon pa ang iyang personalidad sa pagpadayag sa iyang sentiment.
Gitumbok ni Garcia ang post sa usa ka Dr. Bernard Chiew nga nasuko sa mensahe.
Gipasabot ni Garcia nga dili igong rason nga tungod kay ang mga doktor ang anaa sa atubang batok sa COVID-19 mopahimulos na sa sila sa pagpaganansiya.
“Everyone of us, in one way or another, are also in the forefront in this fight. From the business establishments who have to close shop, to the many of us who have to stop working and earning a living for our families, are all involve in this fight against the corona virus,” matud ni Garcia.
Nanghinaut si Garcia nga sabton sa mga doktor ang kalisud nga nahiaguman sa katawhan karon tungod sa krisis.
“I hope these doctors and owners of hospitals will hear the voices of millions of hungry children and see the pained looks of their parents helpless to do anything about it,” matud ni Garcia.
Dugang panghinaut ni Garcia nga tumanon sa mga doktor ang ilang gipanumpaan ug mobati sa kalisud sa katawhan nga nawagtangan sa panginabuhi ug pamatigayon. (BANATNEWS)
- Latest
