Bombero sa Cordova nakalingkawas na sa COVID-19

CEBU, Philippines — Nakaangkon na og hingpit nga kaayohan ang usa sa 16 ka bombero sa Lungsod sa Cordova nga nagpositibo sa coronavirus disease ug andam na usab kini nga mobalik sa iyang trabaho.

Si Fire Officer 2 Glenn Orilla sa Cordova Fire Station niingon nga ang labing unang nakarekober gikan sa pagtakboy sa COVID-19 ang nakagawas niadtong Biyernes human sa napulo ka adlaw nga isolation.

Matud pa ni Orilla nga kadtong nakaangkon na og kaayohan sa COVID-19 maoy kabahin sa unang grupo sa pito ka fire personnel nga nagpositibo niadtong Hunyo 23.

Dugang pa ni Orilla nga adunay siyam pa nga nadugang nga kaso sa COVID-19 sa ilang fire station sanglit 16 man ang kinatibuk-an niining gidaghanon nga naapektohan.

Si Orilla niingon nga ang 16 kinsa nagpositibo sa COVID-19 ang nagpabilin pa gihapon sa public elementary school sa maong lungsod nga mao karon ang gihimong isolation center sa kagamhanan.

Gitataw usab niya nga samtang nagpabilin sila sa isolation kadtong lima nila ka personnel nga tested negative sa infection sa COVID-19 maoy nagpabilin sa ilang fire station gikan sa kinatibuk-an nilang 21 ka personnel. /GMR (BANATNEWS)