Nakalapas sa protocols sa Mandaue itanggong sa DGS

CEBU, Philippines — Gipahibalo kagahapon  sa buntag sa kagamhanan  sa Dakbayan sa  Mandaue nga dakpon na kadtong mga tawo kinsa nagpabilin gihapon nga wala motuman sa protocols sa  general community quarantine.

Dugang sa maong pahibalo nga  gi-post  sa Facebook page sa public information office (PIO) sa maong dakbayan nga kadtong mga madakpan nga nakahimo og kalapasan sa health protocol sa paglikay sa covid-19 adto kini itanggong sa  Department of Government Services (DGS) building nga nahimutang sa Barangay Labogon.

Ang mga polis sa Mandaue City Police Office (MCPO) kauban sa mga barangay kapitan maoy gitahasan sa pagpanakop sa nakalapas nga molupyo nga mogawas sa ilang panimalay nga dili magsul-ob og facemask o mogawas nga walay mahinungdanong katuyoan.

Gitahasan usab sila sa pagdakop niadtong mopasiugda og panagtapok o pagpahigayon og ilegal nga sugal nga naglakip sa tong-it o nagtigbakay.

Ang kagamhanan sa siyudad niawhag sa mga molupyo diha sa kabarangayan nga magpundo diha sulod sa ilang panimalay ug motuman sa mga health protocol aron mapugngan ang pagkuyanap sa virus.

Base sa ulahing natala sa kagamhanan sa siyudad niadtong Hulyo 4, 2020 niabot ngadto sa 990 ang kaso sa covid-19 diin 25 ang namatay ug 311 ang naka-recover.

“Let us all comply with the health protocols. They are not intended to give us a hard time but to protect us from the spread of covi-19”, dugang tipik sa maong advisory. /BDB (BANATNEWS)