Bag-ong schedule sa pagpangompra giluwatan sa Talisay

CEBU, Philippines — Ang kagamhanan sa Dakbayan sa Talisay niluwat kini og bag-ong schedule sa pagpangompra sa mga residente sa kabarangay sa siyudad.

Ang nahisgutang bag-ong schedule epektibo kini karong adlawa.

Kini human nabantayan nga daghang tawo ang manggawas aron sa pagpangompra diha sa merkado ug ubang sa establisamento.

Si Mayor Geral Anthony “Samsam” Gullas, Jr. nagkanayon nga ang una nilang schedule gibase nila sa libreng sakay.

Kini maoy hinungdan nga ang mga residente sa dagkong barangay magdungan sa pagpamalit sa ilang gikinahanglan ug nakapadaghan sa mga tawo nga manggawas.

Apan karon nga nawagtang na ang libreng sakay gipares ang dagko nga barangay sa gagmay nga mga barangay aron menos na ang mga tawo nga manggawas aron mopalit sa ilang gikinahanglan.

Sa adlaw nga Lunes ug Huwebes, ang mga taga Barangay Tabunok, Cansojong, Dumlog, Lawaan 1, Biasong, Mohon ug Tapul maoy makapangompra.

Sa adlaw nga Martes ug Biyernes, ang taga Barangay San Isidro, Tanke, Poblacion, Lawaan 2, Pooc, Candulawan, Manipis ug Campo 4 mao na usab ang makapangompra.

Samtang sa adlaw nga Miyerkules ug Sabado, ang makapangompra mao ang taga Barangay San Roque, Lagtang, Bulacao, Lawaan 3, Linao, Jaclupan ug Maghaway.

Sa adlaw nga Domingo walay tugotan nga makaadto sa merkado o mga mall sa siyudad. Ang merkado ug mall sa siyudad sirado sa maong adlaw aron sila makapahigayon og disinfection.

Sayo pa, ang kapolisan sa siyudad nipahibawo kini nga kadtong moadto sa merkado o diha sa mga mall sa siyudad nga dili pa ang ilang schedule sa pagpangompra ang sikopon. /BDB (BANATNEWS)