Pagdakop sa di mag-face mask ipasar sa SP sa Lapu-Lapu
CEBU, Philippines — Gikatakdang ipalabang sa konseho sa Dakbayan sa Lapu-Lapu ang ordinansahon nga magtugot sa mga residente sa pagdakop sa mga tawo nga maaktohan nga wala magsul-ob og face mask.
Kini isip pagsanong sa awhag ni Mayor Junard “Ahong” Chan sa paghan-ay sa mga guidelines alang sa pagtugot sa mga Oponganon nga mohimo sa citizen’s arrest sa dili magsul-ob og face mask.
“Ang dili pagsul-ob sa facemask maoy pinakadaling paagi nga makakuha o makatakod ka sa virus ug usa sa mga hinungdan nganong nagkasaka ang atong kaso,” matud ni Chan.
“Akong gihangyo ang atong mga konsehales sa Sangguniang Panglungsod ug sa atong pinalanggang Bise Mayor Celsi Sitoy nga sabton ang akong habig ug makita ang tinuoray nato nga katuyoan sa akong isugyot nga ordinansahon,” dugang sa mayor.
Niadtong Biyernes natala ang dugang 86 ka bag-ong kaso sa COVID-19 sa dakbayan nga naglakip na niini ang 12 ka sakop sa kapolisan nga nadestino sa control checkpoint sa dakbayan.
Base sa ordinasahon, ang madakpan adunay silot nga pagpahimangno sa unang higayon, pagbayad og multa sa ikaduha sa kantidad nga P1,000 ug P3,000 alang sa ikatulo nga kalapasan. /GMR (BANATNEWS)
- Latest