Anti-Terror Bill pirmado na

CEBU, Philippines — Gipirmahan na ni Presidente Rodrigo Duterte  ang kontrobersiyal nga anti-terrorism bill isip usa ka balaod pipila ka adlaw human ang Department of Justice ug ang Office of the Chief Presidential Legal Counsel miduso sa ilang rekomendasyon sa ilang mga sugyot, nga gikabalak-an sa human rights groups nga magamit pagabuso sa mga tigpatuman sa balaod.

Ang tigpamaba sa presidente, Harry Roque mikompirmar pinaagi sa text message niini sa Philstar.com nga napirmahan na kini isip usa ka balaod.  Atol sa state of the nation address (SOCA) ni Duterte niadtong Hunyo 22, si Pres. Duterte miingon nga daghang hulgang giatubang ang gobiyerno karon gikan sa Abu Sayyaf  ug mga rebeldeng New People’s Army nga padayong nangatake bisan nagatubang ang nasud karon sa COVID-19 pandemic.

Daan ng gibabagan sa mga human rights groups nga naglakip sa Concerned Lawyers for Civil Liberties (CLCL) , National Union of People's Lawyers, ug mga militanteng pundok ang maong balaod tungod hulga kini sa tawhanong katungod ug demokrasya ilabi na nga dili klaro kun unsay gipasabot sa “terrorist acts.” Apil sa gikahadlokang probisyon niini, mahimong dakpon ang gidudahang terorista bisan way warrant of arrest ug tanggungon hangtud 24 ka adlaw bisan way kasong gipasaka. Hinuon gipasalig sa Department of Interior and Local Government nga dili makonsiderar nga terorismo ang pagpadayag og aligutgot batok sa gobiyerno ug dili kini gamiton aron sila pahilumon.

"The aim of the Anti-Terrorism Bill is to eradicate terrorism from our country. The people have nothing to fear from this bill; it is only the terrorists and their supporters who should fear it," si DILG Secretary Eduardo Año nagkanayon. Philstar.com/IBM