DA-7 compound sa Mandaue ‘lockdown’

CEBU, Philippines — Sirado ang buhatan sa Department of Agriculture 7 nga nahimutang sa Maguikay, Dakbayan sa Mandaue sugod karong adlawa hangtud Biyernes.

Kini ang gipahibawo ni DA-7 Regional Executive Director Salvador Diputado aron pag-decontaminate sa tibuok lugar nunot sa pagpositibo sa coronavirus disease sa usa nila ka kawani.

Mopatuman sab og curfew ang DA-7 sa mga residente sa sikbit nga lugar nga moagi sa compound ug adunay logbook alang sa contact tracing.

Suspendido sab ang pipila ka kalihukan sa DA-7 hangtud sa ilang pagbukas pagbalik sa Hulyo 6, 2020. — Gregg M. Rubio

Cash-for-work program sa nawad-an og trabaho sa Lapu-Lapu

Nakapahimulos sa cash-for-work program sa kagamhanan sa Dakbayan sa Lapu-Lapu ang mga residente nga nawad-an og trabaho tungod sa coronavirus disease 2019.

Kini ang gipahibawo ni Mayor Junard “Ahong” Chan kinsa niingon nga natigayon ang paningkamot sa kagamhnanan sa dakbayan sa pagtabang sa mga nawad-an og trabaho ubos usab sa “Project Tupad”. “Project Tupad is an initiative of the Lapu-Lapu City government where the city will be giving jobs to those Oponganons who have been displaced due to the pandemic,” matud ni Chan.

Matud pa niya nga sugdan na sa pagpasiugda ang Project Tupad karong semanaha pinaagi usab sa Manpower Office sa kagamhanan sa dakbayan nga gipangulohan ni Maricon Gonzalez.

Gitataw niya nga ang mga Oponganon nga makasulod og trabaho ubos sa Project Tupad ang malakip sa team nga maoy mopahigayon og disinfection sa mga publikong lugar ug ang pipila kanila adto ipahimutang sa public information drive o tahasan usab sa dakbayan sa pagbantay niadtong mga nakalapas sa health protocol.

“Ang atong administrasyon naglantaw sa atong mga kaigsuonan nga maoy labing naapektohan sa krisis nga atong giatubang karon. Maong nagmugna kita og mga programa nga sama niini in partnership sa Department of Labor and Employment (DOLE) 7,” matud ni Chan. /GMR (BANATNEWS)