Nurse nga giingong nangita og shabu nasikop sa kapolisan
CEBU, Philippines — Usa ka nurse nadakpan human nga nasita gahapon sa ala una sa hapon sa Barangay Tejero, Dakbayan sa Sugbo.
Giila ang dinakpan nga si Daniel James Dorong, 24-anyos nga taga Barangay Tabok, Dakbayan sa Mandaue.
Matud ni Waterfront Police Station Police chief, Captain Miles Damoslog, nga pasado alas 9 sa buntag nabantayan sa Cebu City Traffic Office (CCTO) ang sakyanan nga nakaparada sa eskina sa dalan M.J. Cuenco.
Dugang pa ni Damoslog nga unag giduol kini sa CCTO aron sitahon sa dihang nihangyo si Dorong kay matud pa maghatag og medical supply ngadto sa barangay hall hinungdan nga gitugutan lang kini nga makaagi.
Luyo sa Sitio Bliss diin adunay mga polis nga nagbantay ug gipangayoan kini og identification card tungod kay taud-taud na kini nga nagtuyok-tuyok sa Barangay Tejero kay diay nangita og shabu.
Sa pagkuha sa ID niini sa bulsa nabantayan sa kapolisan nga kadudahan ang lihok lakip na nga nagsige kini og kumot sa iyang kamot sa dihang gipaabli ang kamot nakuha mao ang mga foil ug lighter nga gamiton unta niini pagsuyop.
Kasong kalapasan sa Section 12 sa Republic Act 9165 ang atubangon nga kaso ni Darong. /GMR (BANATNEWS)
- Latest
