Random checkpoints gipatuman sa Talisay
CEBU, Philippines — Gisugdan na sa kapolisan sa Dakbayan sa Talisay ang ilang random checkpoints matag adlaw.
Kini aron maseguro nga mahipos ang mga kriminal ingon man mga tawo nga masupakon sa safety protocols nga gipatuman.
Si Police Major Gerard Ace Pelare, hepe sa Talisay City Police Station, nagkanayon nga 16 ka checkpoints matag adlaw ang ilang himuon sa nagkadaiyang lugar.
Giplastada sa kapolisan ang duha ka Quarantine Control Precinct sa Bulacao ug South Road Properties samtang aduna sab silay border control sa Laray, San Roque ug sa karsada sa Manipis.
Matud ni Pelare nga tulo ka checkpoints sa Tabunok Market, Cansojong ug Bulacao aron mosusi sa mga sakyanan ug modakop sa mga tawo nga wala gitugutan nga mogawas sa ilang panimaye.
Gitambagan sab ang taga Dakbayan sa Talisay nga dili nalang mopugos sa pagsulod sa Siyudad sa Sugbo nga gipaubos karon sa enhanced community quarantine (ECQ). (BANAT NEWS)
- Latest