Rally dali nahuman kay raliyesta naglibwag og panagan?

CEBU, Philippines — Ang mga sakop sa caused oriented group wala modayon sa pagpahigayon sa ilang rally diha sa gawas sa University of the Philippines (UP) Cebu Campus.

Matud ni Regletto Imbong, convenor sa Movement Against Tyranny Cebu nga wala nila gipugos aron dili masakrapisyo ang iyang mga kaubanan ilabi na nga nakadawat sila og taho nga sayo sa buntag kagahapon adunay presensiya sa kapolisan diha sa lugar.

Atol sa kasaulogan sa ika-122nd nga kaugalignan kagahapon nagpahigayon sila og “lighting rally” diha sa Gorordo Avenue diin ilang gisinggit ang pagbasura sa anti-terrorism bill.

Ang maong rally nilanat lang kini og 31 segundos tungod kay naglibwag og panagan ang mga raliyesta dihang nakadungog og wangwang sa kapolisan.

Apan gipasabot ni Regletto nga ilaha kadtong gituyo ug lakip kadto sa disensiyo sa ilang programa ug wala gibati og kahadlok ang ilang grupo.

Ang direktor sa Cebu City Police Office Police Colonel Cedric Earl Tamayo nipasabot nga kong adunay mass gathering nga sobra sa napulo ka tawo ilahang duolon ug sitahon.

Ug kong masuta nga nakalapas sila sa social distancing, walay face mask ug walay tumong ang pagtapok papaulion nila kini.

Matud ni Tamayo nga gipabutangan niya og polis diha dapit sa UP Cebu Campus panagana  kong adunay lihok-protesta aron dili na masubli ang unang hitabo.

Nunot niini, gawas sa lihok-protesta batok sa anti-terrorism bill, adunay laing mga grupo ang nagpahigayon usab og rally nga nagpadayag sa ilang pagsuporta sa pagpasar sa maong bill.

Gawas niini nipahigayon usab og feeding program ang grupo sa mga libudsuroy sa Barangay Ermita, San Nicolas ug Pasil. Sheriza Mae R. Uy/BDB (BANATNEWS)