Hubakon sikop sa buy-bust
CEBU, Philippines — Nasikop ang hubakon nga durugista sa mga sakop sa Provincial Intelligence Branch sa Sitio Riverside, Barangay Cansojong, Dakbayan sa Talisay niadtong Biyernes sa gabii.
Ang dinakpan nailhan nga si Bernard Filoteo, 49, nagpuyo sa maong dapit.
Ang sakop ni Lt. Col. Marlu Conag, hepe sa PIB, nirumbo sa lugar ni Filoteo ug nagpakaaron-ingnon nga mopalit og ilegal nga drugas.
Giangkon ni Filoteo nga mogamit siya og ginadiling drugas aron mahuwasan sa iyang hubak apan iyang gihimakak ang daghan nga drugas nga giingong nakuha gikan kaniya.
Samtang dili mominus sa P816 mil nga balor sa drugas ang nasakmit sa mga tinugyanan sa Philippine Drug Enforcement Agency 7 ug Guadalupe Police Station atol sa buy-bust operation sa may J. Labra Street, Barangay Guadalupe niadtong Biyernes sa hapon.
Duha ka tawo ang nasiko nga sila si Gino Señires, 20, ug Dither Gonzaga, 18, pulos residente sa Barangay Kalunasan.
Nasakmit gikan kanila ang duha ka putos nga motimbang og 120 gramos, usa ka cellphone ug buy-bust money.
Matud sa tigpamaba sa PDEA-7, Leia Albiar-Alcantara, nga nasikop na kaniadto si Señires tungod gihapon sa ginadiling drugas apan nakapiyansa. Rowena D. Capistrano/GMR (BANATNEWS)
- Latest
