Sitio Zapatera pabiling lockdown

CEBU, Philippines — Human sa duha ka buwan, nagpabilin nga lockdown ang Sitio Zapatera, Barangay Luz, Dakbayan sa Sugbo.

Niadtong Hunyo 2 si Mayor Edgardo Labella nimando kang City Administrator Floro Casas, Jr., Philippine National Police (PNP) ug Cebu City Disaster Risk Reduction and Management Office sa paghimo og lakang ngaa malibkas na ang lockdown.

Kini subay sa rekomendasyon sa Cebu City Health Department niadtong Mayo 27, 2020.

Si Eldebrian Arañez, tigpamaba sa barangay, niingon nga magpaabot sila sa kapolisan nga maoy mopatuman sa kamanduan ni Labella.

Gikinahanglan sab ang rekomendasyon sa Department of Health ug Department of the Interior and Local Government.

“Gi-comply na sa City Hall ang mga documents, so waiting nalang ta na ang mga papers ma sign na sa regional director kay once ma signed na to, ang PNP will implement dayon the total lift sa lockdown sa Sitio Zapatera,” matud ni Arañez.

Nasayran nga mokabat sa 300 ka trabahante ang apektado sa lockdown sa maong sitio.

Matud ni Arañez nga nagpadala na sila og suwat sa director sa Cebu City Police Office nga hatagan og exemptions ang mga trabahante sa Sitio Zapatera.

Kahinumduman nga si Labella nilibkas na sa lockdown niadtong Mayo 20 human daghan na ang nangaayo sa sitio apan ang CHD nipatuman pagbalik sa lockdown dihang duna pay mga residente nga nagpositibo sa Covid-19.

Ang Sitio Zapatera gi-lockdown niadtong Abril 7, 2020 human natala ang daghang kaso sa Covid-19. /GMR (BANATNEWS)