Lagda sa trapiko ipasunod sa magbiseklita sa Mandaue

CEBU, Philippines — Higpit nga ipatuman sa buhatan sa Traffic Enforcement Agency of Mandaue ang mga lagda sa trapiko dili lang sa mga sakyanan kun dili lakip na sa mga magsakay og biseklita.

Si Arnold Malig-on, operation chief sa TEAM, nipadayag nga ilang namatikdan nga nagkadaghan ang nigamit og biseklita tungod sa kalisud sa pangpubliko nga transportasyon.

Gitataw niya nga ang ilang paghigpit sa pagpatuman sa mga lagda sa trapiko gitumong sa paglikay sa aksidente.

Usa niini ang pagdili sa mga senior citizens ug mga bata sa paggawas sa panimalay nga magsakay og biseklita nga ang tuyo mao lang ang pagsuroy-suroy.

Gipahimangnoan ni Malig-on ang magsakay og biseklita nga likayan ang counter flow ug ang pag-obserbar sa signal light.

Samtan sa Dakbayan sa Lapu-Lapu, giawhag ni Mayor Junard “Ahong” Chan ang mga Oponganon nga motorista nga likayan ang pagpaangkas sa ilang motorsiklo.

Kini nunot sa pamahayag ni Presidente Rodrigo Duterte nga gidili ang pagpaangkas sa motorsiklo aron paglikay sa coronavirus disease 2019.

Gitataw niya nga bisan kun gihimo usab niya ang paghangyo sa Inter-Agency Task Force (IATF) nga itugot ang pagpaangkas sa motorsiko sa asawa o sakop sa pamilya apan wala siya kadawat og tubag hangtud niining panahona. Hugot usab niyang gihangyo ang mga molupyo sa dakbayan sa pagtuman sa mga health protocol sa paglikay sa Covid-19 nunot usab sa pagpaubos sa general community quarantine (GCQ) sa dakbayan.

Naglakip na niini ang pagsul-ob og face mask kun mogawas, sundon ang social distancing ug himoon usab kanunay nga pagpanghunaw sa kamot gamit ang sabon ug tubig o alcohol.

Gisubli ni Chan ang maong pahimangno sa mga Oponganon sanglit padayon gihapon ang pagsaka sa gidaghanon sa gitakboyan og Covid-19 sa dakbayan. /GMR (BANATNEWS)