62 ka pamilya sa Mandaue lockdown sab

CEBU, Philippines — Nagpabilin pa gihapon nga gipaubos sa lockdown ang lima ka barangay sa Dakbayan sa Mandaue nga gipuy-an sa 62 ka pamilya bisan ubos na sa general community quarantine (GCQ) ang dakbayan.

Nunot niini hugot nilang gipatuman ang pagsirado sa 62 ka pamilya sa sulod sa ilang panimalay nga nahisakop sa napulo ka metros nga gilay-on sa panimalay nga gipuy-an sa nagpositibo sa coronavirus disease 2019.

Sa post sa Facebook page sa Public Information Office (PIO) sa maong dakbayan maoy nasayran nga ang labing daku nga gipahigayon nga lockdown niadtong Hunyo 5, 2020 sa Barangay Mantuyong nga gilangkuban sa 57 ka balay.

Si Atty. John Eddu Ibañez, executive secretary ni Mayor Jonas Cortes, niingon nga ang paglibkas sa gipatuman nga lockdown sa maong mga dapit ang nag-agad sa rekomendasyon sa Emergency Operations Center ug Inter-Agency Management Team sa dakbayan.

Gisugdan ang lockdown sa maong dapit niadtong Mayo 6 diin ang MC93 nga pasyente namatay niadtong Mayo 3, 2020.

Gilangkuban sa 14 nga kompirmadong Covid-19 positive ang nahisgutang dapit.

Gitataw hinuon ni Ibañez nga ilang gipabot ang resulta sa gipahigayon nga Covid-19 test nga kun masuta nga negatibo ilang libkason ang lockdown nga gihimo. /GMR (BANATNEWS)