Jeepney drivers nitiyabaw

CEBU, Philippines — Bisan paman og gipaubos na sa General Community Quarantine ang siyudad sa Sugbo sugod kagahapon Hunyo 1 apan wala gihapoy public transportation nga gitugotang makabiyahe kun walay special permit nga giluwatan gikan sa LTFRB.

Ang gitugutan nga maka-operate mao lang ang mga buses ug modern jeepneys aron ma-obserbar ang social distancing isip kabahin sa new normal nga lisud ipatuman sa mga karaang public utility jeepneys nga dili makompromiso ang panglawas sa mga pasahero.

Tungod niini, ang Pinagkaisang Samahan Ng mga Tsuper at Operators nationwide (PISTON) Cebu Chapter niapil sa “Busina Para sa Balik-Pasada” nga usa ka online protest aron pagpadayag sa ilang mga panawagan sa gobyerno nga sila makabiyahe pagbalik.

Ang jeepney driver nga si Rodrigo Sotavento, sa PISTON-Mabolo miasoy nga kun tugotan sila makabiyahe magpasalamat sila og dako kay naglisod na kaayo ilang pamilya karon tungod sa COVID-19           pandemic.

Sobra duha ka bulan nang wala makapamasahero ang mga PUJs sa kadalanan tungod sa hugot nga pagpatuman sa social distancing aron mapakgang ang pagkatab sa virus.

Dugang niya sila nga mga drivers kun dili maka drive sa usa ka adlaw dili sila makakaon.

Ang suporta nga gihatag sa gobyerno sa ilaha dugay rang nahurot maong lisod na gyud ilang kahimtang karon.

Lakip sa nanghinaot nga dunggon ang ilang yangungo mao si Floro Rodrigo nga usa gihapon ka jeepney driver nga sigon niya kapin duha ka buwan na silang nagdaginot bisan sa ilang pagkaon. Giangkon niini nga duna sila’y kabalaka nga basin og dili na pabalikon og biyahe.

Ang grupong PISTON mialegar nga gigamit sa gobiyerno ang pandemic aron hingpit nang i-phase out ang PUJs pinaagi sa pagluwat sa LTFRB sa Memorandum Circular 2020-017  nga kadto lang mga bag-ong pasaheroan maoy tugotang makapamasahero atol sa pandemic.

Ubos sa maong circular, kinahanlang molukat Special Permits ang drayber o operator aron sila hatagan og rotang subayon panahon sa quarantine aron pagsigurong limitado lang ang gidaghanon sa mga magdagang sakyanan sa kadalanan.

Kadto lang sab mga pasaheroang rehistrado ubos sa kooperatiba maoy gitugotan.

Namatikdan nga sagad sa mga nagdagan karon mao ang mga modernong pasaheroan nga electric minibuses o mga bus tungod kay maoy mas ganahan karong sakyan sa mga tawo tungod sa kaharuhay ug pagtuman sab sa social distancing.

"Usa na sa pagkadako nga sagmuyo sa atong mga gagmay nga operator ug mga driver.

Ang huna-hunaon unta ug buhaton sa gobyerno kay unta maka-recover ta sa taas nga panahon nga nahunong angbekonomiya, dili kay ang phase-out ang atong gihuna-huna," Greg Perez, PISTON Cebu Chairperson sa pakighinabi sa telepono. Lorraine L. Ecarma/IBM (BANATNEWS)