Ubos sa GCQ, mga edaran ug minors di gihapon makagawas

CEBU, Philippines — Ang Dakbayan sa Sugbo ipaubos na sa General community quarantine (GCQ) sugod karong adlawa Hunyo 1, hangtod sa Hunyo 15, 2020 human nga gitugtan sa Inter-Agency Task Force for Management of the Emerging Infectious Diseases (IATF) ang hangyo ni Cebu City Mayor Edgardo Labella.

Tungod niini, si Mayor Edgardo Labella nipagawas og executive order no. 79 nga nagbutang sa lungsod isip tamdanan sa GCQ epektibo sa 12:01 AM sa Hunyo 1, 2020 hangtod sa 11:59 PM sa Hunyo 15, 2020 “or unless sooner lifted or withdrawn.”

Ubos sa GCQ kinahanglan sundon ang minimum public health standard  sa tanan.

Naglakip kini sa pagsul-ob og face mask sa publikong lugar sa tanang oras, maayong personal nga hygiene, ug pag-obserbar sa social distancing.

Ang mga residente gitambagan gihapon nga magpabilin sa ilang mga balay, ug mahimo’g mogawas alang sa mga importanteng pagpalit og pagkaon ug serbisyo ug sa manarbaho.

Ang mga quarantine pass nga gi issue sa siyudad gikinahanglan pa alang sa mga gustong maka-access sa mga importanteng butang ug serbisyo.

Pabiling gidili ang paggawas-gawas sa mga edaran ug mga menor de edad, gawas lang kun mopalit og pagkaon ug panginahanglan kun walay makabuhat niini para kanila.

Gitugot na usab ang pag-ehersisyo sa gawas, sama sa pag-jogging ug pagbisikleta apan kinahanglang magsuot og facemask ug tagduha ka metros ang distansya sa usa’g-usa.

Ang mga opisina sa gobiyerno mahimo nga makabalik tanan o ubos “alternative working arrangement” subay sa mga lagda ug mga regulasyon sa Civil Service Commission.

Padayon ang number coding scheme sa mga sakyanan sa kadalanan. Samtang makabiyahe na sab ang mga barkong pasaheroan apan kini kun gikan sila sa lugar nga ubos sa GCQ ug padung sab sa lugar nga ubos sa GCQ lamang. Giawhag sab ang mga pribadong sektor pagpatuman og estriktong health standards  diha sa ilang operasyon. Giawhag sila nga kung mahimo, magpa Rapid Antibody Diagnostic Testing ug / o RT-PCR alang sa COVID-19 ang ilang empleyado.

Subli nang makabalik sa full-capacity ang mga essential industries sama sa health care, pharmacies, veterinary clinics, food manufacturing and supply chains, ug mga groceries.

Gidili gihapon ang mga pagtapok sa mga tawo ug kun dili gyud kalikayan kinahanglang otorisado kini ug nagsunod sa health standards. Samtang limitado lang sa napulo ka tawo ang gitugotang magpundok sa mga relihiyoso kalihokan.

Ang iskedyul sa curfew  magsugod alas-10 sa gabii hangtud sa alas-5 sa buntag. /IBM (BANATNEWS)