15 ka durugista sa Talisay ug Consolacion nasikop

CEBU, Philippines — Walo ka durugista ang nasikop sa sunod-sunod nga operasyon sa kapolisan sa Dakbayan sa Talisay niadtong Biyernes sa gabii.

Si Police Major Gerard Ace Pelare, hepe sa Talisay City Police Station nibutyag nga gisugdan nila ang operasyon mga alas 10:15 sa gabii.

Unang mga nadakpan mao si Noel Delos Santos Mier, Mario Guilipet Cortes ug Jayson Felvin Nacua Jimenez diha sa Lower Mohon.

Ang mga suspetsado nasakmitan kini og og 2.05 gramos drugas nga nibalor tanan ngadto sa P13,940.

Mga alas 11:00 sa gabii, nasikop si Romeo Rosasenia Laresma nga giingong usa ka high value individual (HVI).

Nakuha sa kapolisan gikan kaniya ang drugas nga nitimbang tanan ngadto sa 15.15 gramos ug nagkantidad ngadto sa P103,020.

Laing nadakpan mao si Roy Jason Bacho Avapo giingong usa usab ka HVI diha sa Sitio Kalinao, Barangay San Roque.

Si Avapo nasakmitan kini og 5.21 gramos nga shabu nga nikabat tanan ngadto sa P35,428.

Pagka-alas 11:50 sa gabii nasikop sa kapolisan si Efren Cañedo Alconten, Jaime Lumaktaw Telmoso ug Elrey Nudalo Bacus.

Ang mga suspetsado nasakmitan kini og 22.95 gramos nga shabu nga nikantidad tanan ngadto sa P156,000.

Ang mga suspetsado natingkagol karon diha sa detention cell sa Talisay City Police Station.

Sa laig bahin, pito ka suspetsadong durugistang usab ang nadakpan sa managlahing buy bust operation sa kapolisan diha sa Barangay Poblacion Oriental,  Lungsod sa Consolacion.

Si Police Major Verniño Noserale, hepe sa Consolacion Police Station niila sa mga suspetsado nga sila si Edgar Ligaspina, 40; Dandie Quiño, 40; Antolin Alesna, 32; Eugeno Rosalejos, 35; ug Darwin Isoto, pulos taga Poblacion Oriental sa Lungsod sa Consolacion, Edgardo Villahermosa, 46, taga Barangay Pulpogan sa maong lungsod ug Rosemarie Prado, 3, taga Barangay Jagobiao  sa Dakbayan sa Mandaue.

Sa nasayran nga nakadawat og mga taho ang kapolisan kalabot sa ilegal nga kalihokan sa mga suspetsado diha sa nahisgotang lugar.

Nasakmit sa kapolisan gikan sa mga suspetsado ang shabu nga nagkantidad tanan ngadto sa P100,000.

Ang mga suspetsado nadetiner karon diha sa detention cell sa Consolacion Police Station. Romeo T.  Limpangog/BDB (BANATNEWS)