Dakbayan sa Sugbo taas og recovery sa nataptan sa COVID-19

CEBU, Philippines — Nikabat ngadto sa 44 porsyento o 166 ka tawo ang naka-recover o naayo gikan sa covid-19 sa Dakbayan sa Sugbo matud sa City Health Department kagahapon.

Ang maong gidaghanon lakip kini sa 958 nga kinatibuk-ang naka-recover.

Giingong sa 166 nga naka-recover 149 niini ang sa Barangay Mambaling; 12 sa Barangay Tejero ug lima sa Barangay Guadalupe.

Samtang kagahapon adunay 60 ka bag-ong kaso sa covid-19 sa siyudad ang natala.

Sa maong gidaghanon nga nataptan sa virus 14 niini ang gikan sa Barangay Duljo-Fatima; pito ang gikan sa Barangay Mabolo; unom ang gikan sa Barangay Mambaling; ug lima gikan sa Barangay Tejero.

Ang uban pang mga kaso gikan sa mga barangay sa Pasil nga adunay tulo; Ermita nga adunay tulo usab ; Laing tulo sa Tisa; Suba adunay duha; Sawang Calero adunay  duha usab; Laing duha sa Lorega; Sambag, duha; Tinago, duha; ug Carreta, duha.

Ug adunay laing matag usa ka bag-ong kaso sa mga barangay sa Camputhaw, Labangon, Pardo, Lahug, Quiot ug Calamba.

Ang Dakbayan sa Sugbo aduna na kini 2,202 kinatibuk-ang kaso sa covid-19.

Sa laing bahin, karong adlawa gikatakdang ibalhin ang 35 ka polis nga naka-recover na gikan sa covid-19 diha sa recovery center nga bag-ohay lang gi-turnover ngadto sa Police Regional Office (PRO)-7.

Matud sa direktor sa PRO-7 Police Brigadier General Albert Ferro nga nihimo dayon sila og dry run uban sa medical quick response team sa Regional Health Service-7 ug sa Cebu City Health Department aron masayran unsay kinahanglan nga palambuon.

Gibutuag ni Ferro nga ang PRO-7 adunay pundo alang sa gasto sa mga personnel nga ipaubos sa kapin 20 ka adlaw nga isolation inabagan usab sa kagamhanan sa Dakbayan sa Sugbo.

 Ang Office of the Presidential Assistant to the Visayas (OPAV) nakatabang usab kini alang sa gasto sa maong mga polis.

Giingong dili lang mga polis ang ibutang diha recovery center lakip na kadtong mga frontliners nga magpositibo sa covid-19.

Ang maong mga polis gikatakdang kuhaan kini pag-usab og swab test. Sheriza Mae R Uy/BDB (BANATNEWS)