23 swabs sa Tuburan negatibo; Talisay way dugang COVID-19

CEBU, Philippines — Nagnegatibo tanan sa coronavirus disease (COVID-19) ang 23 ka mga swabs nga nakuha didto sa lungsod sa Tuburan.

Ang maong swabs apil kini sa 26 nga gisumiter alang sa PCR testing sa mga tawong nakauban niadtong usa ka nagpositibo nga gikan sa Cebu City nga niuli sa panimalay niini sa Barangay Caridad niadtong Mayo 1 hangtod Mayo 4, 2020.

“All 23 contacts have tested NEGATIVE of COVID - 19. However, due to shortage of reagents from the testing centers, we are still waiting for the results of the remaining 3 contacts,”pagbasa sa Facebook page sa Municipality of Tuburan, Cebu.

Apan bisan pa niini, pabiling gi-lockdown ang Purok Bajada hangtod di pa mogawas ang resulta sa tulo nga nahibilin.

Sa samang higayon giawhag sa munisipyo ang ilang mga molupyo nga dili motuo-tuo sa mga tabitabi bahin sa maong mga kaso kun dili beripikado ang impormasyon.

“I understand that in a way we all feel anxious, uncertain and worried while waiting for the result of the 3 people but I am requesting everyone to please refrain from spreading, entertaining and believing unverified information,” dugang pa sa maong post.

Sa laing bain, walay bag-ong natala nga positibo sa COVID-19 sa Dakbayan sa Talisay kagahapong adlawa sumala pa ni Mayor Gerald Anthony “Samsam” Gullas Jr.

Apan dili gihapon mokompiyansa ang mayor kay matud niya dili kini garantiyang wala na gyuy madugang nga natakdan sa siyudad.

Sa pagkakaron daghan pang gipaabot nga resulta sa swab test sa mga tawong uwahing nakauban sa mga nagpositibo sa virus ang ilang gipaabot.

Gipahibalo sab sa mayor nga naulian na ang pasyenteng na-admit sa usa ka pribadong tambalanan human napositibo sa COVID-19 ug nakagawas niadtong Mayo 24. Apan bisan pa niini, gipaubos gihapon siya og 14 ka adlaw nga kwarantina aron nga masiguro ang iyang kahimtang. Gabriel Bonjoc/IBM (BANATNEWS)