Report bahin sa rapid test iduso sa DOH-7
CEBU, Philippines — Gikatakdang ipagawas na sa Department of Health 7 ang ilang report ngadto sa Tri-Cities ug Regional Inter-Agency Task Force on Covid-19 karong adlawa o ugma Biyernes nga maghatag og ideya sa mga kadagkoan sa Sugbo kun unsay kahimtang o sitwasyon sa problema sa coronavirus disease (COVID)-19 dinhi sa Sugbo.
Si Dr. Jaime Bernadas, Regional Director sa DOH-7 nga nahinabi sa Banat News miingon nga sa pagkakaron gitun-an pa sa ilang mga partners ang mga report nga ilang iduso.
Gilauman nga kini maoy gamitong basehanan sa mga opisyal kun unsay buhaton sa General Community Quarantine o Modified Enhance Community Quarantine karong padung na mapupos ang mga adlaw nga gitagal sa Inter-Agency Task Force on Emerging Infectious Disease karong Mayo 31.
Ang basehan sa iduso nga report gikan sa resulta sa gidaghanon sa mga nagpaubos sa rapid test sa nagkadaiyang mga barangay ug sa gidaghanon sa mga nagpositibo sa COVID-19 lakip na kun asa sila kadaghanan nagpuyo.
Sumala pa ni Bernadas pinaagi, sa maong taho makita unya kinatibuk-ang hulagway sa tulo ka siyudad kun asa ang daghan og kaso ug kun asa ang kinahanglang matutokan.
Mag-agad usab niini ang mga balay patigayon o matang sa mga negosyong mamahimo nang makabalik sa operasyon ug kadtong di pa gyud pwede tungod sa hulga sa virus. /IBM (BANATNEWS)
- Latest