Cebu City mag-agad sa IATF kun lugwayan o dili ang ECQ sa Mayo 31

CEBU, Philippines — Upat nalang ka adlaw ang paabuton matapos gipatumang extension sa Enhanced Community Quarantine (ECQ) dinhi sa siyudad sa Sugbo ug ang gipaabot sa mga molupyo sa siyudad kun malugyawan ba kini o ma-downgrade na ang ECQ.

Sumala pa ni Cebu City Mayor Edgardo Labella dako kaayo ang kalamboan nga ilang nakita base sa gidaghanon sa mga bag-ong natakboyan sa COVID-19, gidaghanon sa mga nangaayo ug kapasidad sa siyudad paghimo og aksyon bahin niiini.

Gitug-an ni Labella, kung mo downgrade na ngadto sa Modified Enhance Community Quarantine wala magpasabot nga wala nay mga lugar nga dili  mapaubos sa lockdown, apan iyang giklaro nga dili na tibuok barangay kondili mga sitio nalang o ba kaha panimalay nalang sa mga tawong natakboyan.

Pipila sa mga dapit nga na-lockdown ang nagbagulbol gumikan kay dili sila tanan ang nataptan sa maong sakit, apan tungod sa pipila lang ka tawong nagpositibo, napagan silang tanan.

Apan si Labella, nitug-an nga magpadayon ang lockdown sa Mambaling kay sa pagkakaron padayon pa ang gihimong obserbasyon sa maong lugar.

Si Atty. Rey Gealon, ang tigpamaba sa mayor sa iyang bahin miingon nga gihuwat gyud nila ang guidelines sa Inter-Agency Task Force (IATF) base sa ilang pagtan-aw sa sitwasyon sa siyudad karon. Apan dako ang pagsalig ni Gealon nga ma-downgrade ang ECQ sa siyudad0  base sa mga resulta sa mga bag-ong nagpositibo ug sa nangaayo na,

Dako matud pa niya ang puruhon nga ma-downgrade gikan sa ECQ ngadto sa Modified ECQ ang siyudad ayha pa ang General Community Quarantine(GCQ) sama sa gipatuman karon sa probinsya sa Sugbo.

“Ang atong leaning towards GCQ gyud aron magkahina-hinay nasab og bukas ang negosyo, makatrabaho na atong mga igsuong Sugbuanon ug of course the new normal ato man gyud na ipatuman,” dugang pa niini. Rowena Capistrano/IBM (BANATNEWS)