Resulta sa retest sa mga gi-isolate sa BICs nalangay

CEBU, Philippines — Nakauli na ang 29 ka mga nagpositibo sa COVID-19 sa Barangay Labangon sa Dakbayan sa Sugbo nga gibutang sa Barangay Isolation Center sa barangay human nga sila nag negatibo na sa resulta sa ilang test sumala pa ni Atty. Rey Gealon, atol sa gipahigayon nga press briefing kagahapon sa udto.

Matud pa ni Gealon, ang mga nagpositibo nga nag negatibo na, makagawas na sa BIC ug gi dis-infect na usab ang ilang mga pinuy-anan alang sa ilang pagbalik.

Sumala pa ni Gealon, padayon ang ilang pangaliyupo nga magkaubos usab ang mga magpositibo sa dakbayan uban sa pag-ampo sa katawhan.

Gibutyag ni Gealon, kadtong mga nagpositibo nga naa sa BIC sa Pasil nagpaabot pa sa resulta sa swab testing hinungdan nga dili pa sila pagawson mao nga nangayo sila og gamay nga pailob tungod sa kalangay pagpagawas sa mga resulta.

Pipila sa mga gibutang sa BIC sa Pasil ang nagbagulbol diha sa social media kay lapas na sila sa 14 ka adlaw sa maong pasilidad apan hangtod ning pagtaho wala pa silay resulta nga nadawat.

Gipasabot ni Gealon, dili mahimo nga pagawson dayon ang mga pasyente kung dili sila masigurong negatibo na sa virus.

Sayod matod pa si Mayor Labella nga dunay kalangay dinhang dapita apan nangayo sila og gamay nga pagsabot ug pailob sanglit wala’y mahimo ang siyudad sa pagpadali niini tungod kay sunod-sunod ang pagpa-examine sa maong swab tests.

Ang siyudad nihimo na og lakang aron mapadali kini pinaagi sa paghatag og tulo ka PCR Machines diha sa Vicente Sotto Memorial Medical Center. Apan dili kini ekslusibong gigamit para lang sa Cebu City sanglit gigamit kini para sa tibuok rehiyon hinungdan nga adunay backlog sa pagpagawas sa resulta.

“Ang Mayor di man gud gusto adto ibutang sa CCMC para ato ra. Kahibawo man gud si Mayor wala’y capacity financially ang uban for example Vicente Sotto. (Ang) Vicente Sotto wala lang nag-cater sa Cebu City, sa Cebu Province gi-cater nila, ang Region-7 kinatibuk-an gi-cater nila ang uban nga mga swab test gikan pan na sa ubang areas, Siquijor, Bohol, Negros padung didto. So nag-lag siya, wala man na igsapayan sa Mayor kay gusto lagi niya maangay sad ang uban ba,” asoy ni Gealon. Hinoon gitataw ni Gealon nga sa higayon nga mogawas ang resulta ug negatibo na sa virus kadtong gi-isolate sa mga BICs makagawas na dayon sila.

Gawas sa Labangon, nakagawas na sab sa BIC ang mga pasyente sa Barangay Carreta nga negatibo na sab sa COVID-19 karong adlawa sa alas 4 sa hapon. Rowena Capistrano/IBM (BANATNEWS)