Kaso sa COVID-19 sa Talisay nagkadaghan
CEBU, Philippines — Nagkadaghan ang nagpositibo sa COVID-19 sa Dakbayan sa Talisay ug tungod niini, duh aka mga sitio na Brgy. Tanke ang gi-lockdown ni Mayor Gerald Anthony “Samsam” Gullas Jr.sugod kagahapong adlawa.
Apan ang mayor nagtuo nga ang pagdaghan sa mga nadiskubrehang positibo sa maong virus resulta kini sa lapad nga swab testing sa mga nakaubang mga tawo sa unang mga nagpositibo.
Matud pa niya nga mayoriya sa bag-ong nagpositibo mga tawong nakauban sa mga unang natakdan, kadtong mga positibo gibutang na sa isolation centers.
Gawas pa niana, apil sa ilang gipangita mao ang mga tawo nga adunay Influenza Like Illness (ILI) o ang mga tawo nga gipang sip-on, ubo ug hilanat.
“Ato dayo nga i-swab ang mga tawo nga adunay gipamati. Gani duha sa Barangay Cansojong ang nigawas nga positibo sa virus,” sigon pa ni Gullas.
Ang duha ka sitio sa Tanke nga gi-lockdown mao ang Magay ug Tunga nga adunay mga nagpositibo ug gitahasan niya si Dr. Jomar Rubio, executive secretary niini nga maoy moatiman sa panginahanglanon sa mga gi-lockdown.
Si Kapitan Nelson Cabanes nipahuway lang una pagatiman sa iyang mga konstituwente kay adunay gipamati sa lawas apan nakig-alayon na ang mayor sa konseho sa barangay aron maatiman ang mga tawong na-lockdown. Ang kapulisan sa Talisay mao sab ang nimonitor sa mga lihok sa katawhan sa lugar.
Daan nga nipadayag si Gullas sa iyang kabalaka sa Tanke tungod kay sikit-sikit ang mga panimay niini.
Sa pikas bahin, 5-anyos nga lalaki ang naapil sa unom ka mga bag-ong natalang kaso sa COVID-19 sa Dakbayan sa Mandaue nga aduna na karoy kinatibuk-ang gidaghanon nga 229 niadtong Lunes Mayo 24,2020
Ang mga nadugang mao ang 48 anyos nga babaye sa Barangay Maguikay nga gikatagong namatay niadtong Mayo 22, 2020 apan naulahi lang nga migawas ang resulta sa swab test niini. Ang laing tulo mao ang priso sa Mandaue City Jail nga gibutang na sa isolation room sa bag-ong city jail sa Sitio Dungoan, Barangay Basak.
Ang mga personnel sa City Disaster Risk Reduction and Management Office sa Dakbayan sa Mandaue ,kauban sa mga medical personnel sa City Health Office ang nagpahigayon na sa ilang contact tracing sa mga tawong nakauban sa mga bag-ong napositibo. Romeo T. Limpangog/IBM (BANATNEWS)
- Latest