Kaso sa COVID-19 sa Cebu City nadugangan og 27 ka positibo

CEBU, Philippines — Niabot na sa 1,896 ang kinatibuk-ang gidaghanon sa mga kompirmadong kaso sa coronavirus disease(COVID)-2019 sa siyudad sa Sugbo base sa datos sa Cebu City Health Department kagahapong adlawa.

Kini human sa datos sa Cebu City Health Department kagahapon 27 ka bag-ong kaso ang nadugang sa dakbayan.

Ang 27 ka kaso mga bag-ong kaso gikan sa Barangay Duljo nga dunay pito kaso, Barangay Pahina San Nicolas usa ka kaso, upat ka kaso sa Barangay Mambaling gikan sa Sitio Viking ug Larima, usa ka kaso sa Sitio Trinidad sa Barangay Punta Princesa,  usa sab ka kaso sa Barangay Basak San Nicolas, duha ka kaso sa Barangay Camputhaw, usa ka kaso sa Barangay Labangon, tulo ka kaso sa Barangay Sambag 2, usa ka kaso sa Mirasol Street sa Barangay Capitol Site, usa ka kaso sa Rivaridge Barangay Tisa, tag usa sab ka kaso sa Barangay Suba, Lorega, Tejero, San Antonio ug Sawang.

Sagad sa mga kaso sa Cebu City asymptomatic o wala'y sintomas sa virus ug gibalhin na sa Barangay Isolation Centers aron matambalan sa mga tinugyanan sa Cebu City Health Department.

Samtang gipahibawo sa CCHD nga 56 ka mga pasyente sa siyudad na ang naka-recover sa COVID-19 kagahapong adlawa. Gikan sa Barangay Labangon nga 29 ka pasyente, 23 sa Sitio Negative Barangay Carreta, duha sa Barangay Lahug ug usa sa Barangay Inayawan.

Ang siyudad padayon nga miawhag sa katawhan nga magpundo sa balay ug dili mogawas kung walay importanteng tuyo ug dili sab kalimtan ang pagsul-ob og face mask. /IBM (BANATNEWS)